Mətbuat xidməti
ÖTƏN YARIMİL KƏNGƏRLİDƏ DAŞINMAZ ƏMLAKLA BAĞLI VƏTƏNDAŞLARA NÜMUNƏVİ XİDMƏT GÖSTƏRİLİB
17.07.2023
Yanvar-iyun aylarında Kəngərli rayonunda daşınmaz əmlak obyektləri üzərində mülkiyyət hüquqlarının qeydiyyatı və torpaqlardan təyinatı üzrə istifadəyə, onların mühafizəsinə dövlət nəzarəti ilə bağlı görülən işlər Daşınmaz Əmlak və Torpaq Məsələləri üzrə Dövlət Xidmətinin Kəngərli Rayon Şöbəsi tərəfindən davam etdirilib.
Şöbə vətəndaşlardan daxil olan müraciətlərə əsasən birinci yarımil ərzində 60 fərdi yaşayış evinin, 16 mənzilin, 3 əmlak kompleksi kimi müəssisənin, 7 qeyri-yaşayış binasının texniki pasportunu və 51 torpaq sahəsinin plan-ölçüsünü hazırlayıb. 2022-ci ilin müvafiq dövrü ilə müqayisədə rayon üzrə hazırlanan mülkiyyət sənədlərinin sayı 25,7 faiz artıb.
Daşınmaz əmlak üzərində hüquqların dövlət qeydiyyatına alınması üçün müraciətlərə vaxtında baxılıb, dövlət reyestrindən 167 çıxarış, məhdudiyyət və yüklülüyə dair 109, əmlakın olub-olmamasına dair 269 arayış, torpaq sahəsinə dair 6 rəy verilib. Texniki sənədlərin hazırlanması zamanı əmlaklara yerində baxış keçirilərək 63 müayinə aktı yazılıb, 8 bölgü planı hazırlanaraq vətəndaşlara təqdim edilib.
ÜMUMMİLLİ LİDER HEYDƏR ƏLİYEVİN ANADAN OLMASININ 100 İLLİYİNƏ HƏSR OLUNMUŞ “YAY MƏKTƏBİ” BAŞA ÇATIB
14.07.2023
Ümummilli Lider Heydər Əliyevin anadan olmasının 100 illik yubileyi ilə əlaqədar Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidmətinin, Naxçıvan Dövlət Universitetinin və Naxçıvan Muxtar Respublikasının Həmkarlar İttifaqları Şurasının birgə təşkilatçılığı ilə Ağbulaq İstirahət Mərkəzində Xidmətin hamiliyinə verilmiş “Yerquruluşu və daşınmaz əmlakın kadastrı”, “Torpaqşünaslıq və aqrokimya” ixtisaslarında təhsil alan tələbələr üçün təşkil olunmuş “Yay məktəbi” başa çatıb.
“Yay məktəbi”nin birinci gün açılış mərasimi keçirildikdən sonra iştirakçılar mərkəzdə yaradılan hərtərəfli şəraitlə tanış olublar. Hamiliyə verilən tələbələrin müvafiq sahə ilə bağlı bilik səviyyələrini artırmaq məqsədilə daşınmaz əmlakın qeydiyyatı, inventarlaşdırılması, göstərilən xidmətlər zamanı istifadə olunan xüsusi proqramlar barədə ətraflı məlumat verilib. Həmçinin, tələbələr daşınmaz əmlakın inventarlaşdırılması ilə bağlı qrup işlərinə də cəlb olunub, ərazidə cihazlar vasitəsilə plan və ölçü aparıblar. Günün davamında iştirakçılar üçün Ümummilli Lider Heydər Əliyevdən bəhs edən “Xalqın adamı” sənədli filmi nümayiş olunub.
ÜMUMMİLLİ LİDER HEYDƏR ƏLİYEVİN ANADAN OLMASININ 100 İLLİYİNƏ HƏSR OLUNMUŞ “YAY MƏKTƏBİ”NƏ START VERİLİB
13.07.2023
Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidmətinin, Naxçıvan Dövlət Universitetinin və Naxçıvan Muxtar Respublikasının Həmkarlar İttifaqları Şurasının birgə təşkilatçılığı ilə Ağbulaq istirahət mərkəzində Ümummilli Lider Heydər Əliyevin anadan olmasının 100 illik yubileyi ilə əlaqədar olaraq Xidmətin hamiliyinə verilmiş “Yerquruluşu və daşınmaz əmlakın kadastrı”, “Torpaqşünaslıq və aqrokimya” ixtisaslarında təhsil alan tələbələrin “Yay məktəbi”nə start verilib.
Açılış mərasimində Xidmət rəisinin müavini Nurlan Fətəliyev çıxış edərək Ulu Öndər Heydər Əliyevin ölkəmizdə əmlak və torpaq idarəçiliyinin inkişafı sahəsindəki əvəzsiz xidmətlərindən bəhs edib. Xidmətin hamiliyinə verilmiş ixtisaslarda kadr hazırlığına dəstək istiqamətində görülmüş işlər qeyd olunub, tələbələrin bacarıqlı mütəxəssis kimi formalaşmasında təşkil olunmuş “Yay məktəbi”nin əhəmiyyəti vurğulanıb.
Naxçıvan Dövlət Universitetinin prorektoru Arzu Abdullayev Ümummilli Liderimizin gəncliyə diqqət və qayğısından danışıb, keçirilən “Yay məktəbi”nin tələbələrin bilik və bacarıqlarının artırılmasına mühüm töhfə verəcəyini qeyd edib.
ÖTƏN AY 765 DAŞINMAZ ƏMLAK OBYEKTİ QEYDİYYATA ALINIB
06.07.2023
Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidməti tərəfindən daşınmaz əmlak üzərində hüquqların dövlət qeydiyyatı iyun ayı ərzində davam etdirilib, torpaqlardan təyinatına uyğun və səmərəli istifadə edilməsinə nəzarət diqqətdə saxlanılıb.
Ay ərzində daxil olan müraciətlər əsasında ümumilikdə 765 daşınmaz əmlak obyekti üzərində hüquqlar dövlət qeydiyyatına alınıb, 534 texniki sənəd hazırlanıb. Muxtar respublika üzrə ilkin qeydiyyat, bölünmə və birləşmə nəticəsində yeni yaranan 37 daşınmaz əmlak obyektinə ünvan verilib. Məhdudiyyət və yüklülüyə dair 242 arayış vətəndaşlara təqdim edilib, elektron informasiya sistemi vasitəsilə 677 əmlaka dair məhdudiyyət və yüklülük haqqında məlumat notariat ofislərinə göndərilib.
Xidmətin fəaliyyət istiqamətləri üzrə təqdim etdiyi elektron xidmətlərə hüquqi və fiziki şəxslər tərəfindən daxil olan 119 müraciət qəbul edilərək icra olunması üçün aidiyyəti üzrə yönəldilib. Həmçinin, “ASAN xidmət” Mərkəzində müvafiq xidmət növləri üzrə ümumilikdə 405 vətəndaş müraciəti qəbul edilib.
Kəngərli rayonunun Çalxanqala kəndində bələdiyyə sədrlərinin, ailə təsərrüfatı başçılarının, torpaq mülkiyyətçilərinin, istifadəçilərinin və icarəçilərinin iştirakı ilə maarifləndirici tədbir keçirilib.
Bugün 
