Mətbuat xidməti
KƏNGƏRLİ RAYONUNDA SEMİNAR-MÜŞAVİRƏ KEÇİRİLİB
22.12.2022
Torpaqlardan təyinatına uyğun, səmərəli istifadənin təmin edilməsi məqsədi ilə Kəngərli rayonunun torpaq mülkiyyətçilərinin, istifadəçi və icarəçilərinin, bələdiyyələrinin iştirakı ilə keçirilən seminar-müşavirədə bitkilərin qida maddələrinə olan tələbatının ödənilməsinin məhsuldarlığa təsirindən bəhs olunub.
Naxçıvan Muxtar Respublikasının Kənd Təsərrüfatı Nazirliyi, Daşınmaz Əmlak və Torpaq Məsələləri üzrə Dövlət Xidməti və Akademik Həsən Əliyev adına “Araz” Elm İstehsalat Birliyinin birgə təşkilatçılığı ilə keçirilən seminar-müşavirədə Kəngərli Rayon İcra Hakimiyyətinin əməkdaşı Nuran Şahhüseynov rayonun coğrafi mövqeyinə uyğun kənd təsərrüfatı sahələrinin inkişaf istiqamətlərindən, təsərrüfatçılara göstərilən dövlət qayğısından danışıb.
Tədbirdə kənd təsərrüfatı məhsulları istehsalının artırılması üçün torpağın münbitliyinin qorunub saxlanılması və onun artırılması yolları, əkin dövriyyəsindən kənarda qalan torpaqların əkinə cəlb olunması istiqamətində qarşıda duran vəzifələr iştirakçıların diqqətinə çatdırılıb. Mütəxəssislər tərəfində torpaq analizlərinin aparılması ilə bağlı məlumat verilib.
Vurğulanıb ki, torpaqların qida maddələri ilə təmin olunma kartoqramları müxtəlif ərazilərdən götürülən torpaqların laborator analizlərindən alınan yekun nəticələrə uyğun hazırlanır, lazımi gübrə normaları müəyyənləşdirilir. Kartoqramlardan düzgün istifadə sahələrdən yüksək məhsul götürülməsinə təminat verir.
Bildirilib ki, cari ildə Kəngərli rayonunun Çalxanqala, Yurdçu, Qabıllı və Yeni Kərki kəndlərinin torpaqlarının laboratoriya şəraitində analizləri aparılıb, təqdim olunmuş məlumatlar əsasında müvafiq kartoqramlar hazırlanıb.
ORDUBAD RAYONUNDA ƏMLAK VƏ TORPAQ MƏSƏLƏLƏRİ İLƏ BAĞLI VƏZİFƏLƏR UĞURLA İCRA EDİLİB
13.12.2022
Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidmətinin Ordubad Rayon İdarəsi tərəfindən mülkiyyət hüquqlarının qeydiyyatının aparılması, plan-ölçülərin hazırlanması, torpaqlardan qanuni və təyinatına uyğun istifadəyə, həmçinin onların mühafizəsinə dövlət nəzarətinin artırılması noyabr ayında da prioritet istiqamət kimi müəyyənləşdirilib.
Ötən ay ərzində idarə tərəfindən 12 fərdi yaşayış evinə, 4 mənzilə məxsus, ümumilikdə, 16 daşınmaz əmlak obyektinin texniki pasportu hazırlanıb, 40 torpaq sahəsinin planı və ölçüsü tərtib edilərək vətəndaşlara təqdim edilib. Texniki sənədlərin hazırlanması məqsədilə əmlaklara yerində baxış keçirilib, 25 müayinə aktı arxiv sənədlərinə əlavə olunub.
Rayonda hüquqların dövlət qeydiyyatına alınması və dövlət reyestrindən çıxarışın verilməsi sahəsində də müvafiq işlər görülüb, 68 müraciətə vaxtında baxılıb, məhdudiyyət və yüklülüyə dair 31 arayış verilib. Eyni zamanda 2 sosial arayış, 3 ünvan arayışı, 3 dublikat sənəd, 6 torpaq sahəsinə dair rəy hazırlanaraq aidiyyəti üzrə təqdim edilib.
Vətəndaşlar tərəfindən idarəyə daxil olan 14 şifahi müraciət operativ cavablandırılıb, müraciətlərlə bağlı əmlaklara yerində baxış keçirilərək qanuna müvafiq tədbirlər görülüb və qanunvericiliyin tələbləri rayon sakinlərinə ətraflı izah edilib.
DÖVLƏT QULLUQÇUSUNUN XİDMƏTİ FƏALİYYƏTİNİN QİYMƏTLƏNDİRİLMƏSİNƏ VƏ KARGÜZARLIĞIN APARILMASI QAYDALARINA DAİR TƏLİM KEÇİRİLİB
12.12.2022
Naxçıvan Muxtar Respublikası Daşınmaz Əmlak və Torpaq Məsələləri üzrə Dövlət Xidmətində keçirilən təlimə Xidmətin aparatının, şəhər, rayon idarə və şöbələrinin əməkdaşları cəlb olunub. Təlimdə Xidmətin ümumi şöbə müdiri Ruslan Rüstəmov dövlət qulluqçusunun xidməti fəaliyyətinin qiymətləndirilməsi və dövlət orqanlarında kargüzarlığın aparılması qaydaları barədə ətraflı məlumat verib.
Təlim iştirakçılarının diqqətinə çatdırılıb ki, dövlət qulluqçusunun xidməti fəaliyyətinin qiymətləndirilməsi “Dövlət qulluğu haqqında” Azərbaycan Respublikası Qanununun müvafiq maddəsinə əsasən həyata keçirilir. Burada əsas məqsəd dövlət qulluqçusunun təqvim ili ərzində vəzifəsinin öhdəsindən gəlməsini və tutduğu vəzifəyə dair tələblərin yerinə yetirilməsini qiymətləndirməkdən və onun gələcək inkişafını təmin etməkdən ibarətdir.
Qeyd olunub ki, 3 may 2021-ci ildə Naxçıvan Muxtar Respublikasının Nazirlər Kabinetinin müvafiq Qərarı ilə “Naxçıvan Muxtar Respublikasında dövlət qulluqçusunun xidməti fəaliyyətinin qiymətləndirilməsi Qaydası” təsdiq edilib. Həmin qayda dövlət qulluqçusunun cari fəaliyyətinə nəzarətin həyata keçirilməsi, onun potensial imkanlarının aşkara çıxarılması, bu imkanlardan səmərəli istifadə edilməsi və digər sahələri tənzimləyir.
ÖTƏN AY 709 DAŞINMAZ ƏMLAK OBYEKTİ ÜZƏRİNDƏ HÜQUQLAR DÖVLƏT QEYDİYYATINA ALINIB
07.12.2022
Muxtar respublikada torpaq istifadəçiliyi sahəsində aşkar olunan qanun pozuntularının aradan qaldırılması, daşınmaz əmlak obyektləri üzərində hüquqların dövlət qeydiyyatına alınması noyabr ayında da Daşınmaz Əmlak və Torpaq Məsələləri üzrə Dövlət Xidməti tərəfindən diqqətdə saxlanılıb, əmlak və torpaq idarəçiliyinin müasir əsaslarla qurulması istiqamətində qarşıda duran vəzifələrin icrası uğurla davam etdirilib.
“2021-2025-ci illərdə Naxçıvan Muxtar Respublikasında kənd təsərrüfatı təyinatlı torpaqların münbitliyinin artırılmasına dair Tədbirlər Planı”na uyğun olaraq Şərur rayonunun Yengicə kəndində maarifləndirici tədbir keçirilib. “Naxçıvan Muxtar Respublikasının 2019-2023-cü illərdə sosial-iqtisadi inkişafı Dövlət Proqramı”na müvafiq olaraq muxtar respublikanın iqlim şəraitinə uyğun və yüksək məhsuldarlığa malik yerli meyvə-tərəvəz sortlarının bərpası və tətbiq olunması, əkin atlaslarına uyğun meyvə-tərəvəz əkinlərinin aparılması məqsədilə Naxçıvan Muxtar Respublikası Kənd Təsərrüfatı Nazirliyinin, akademik Həsən Əliyev adına “Araz” Elm-İstehsalat Birliyinin nümayəndələri ilə birlikdə Şahbuz rayonunun Kolanı kəndində bələdiyyə sədrlərinin, torpaq mülkiyyətçilərinin, istifadəçilərinin və icarəçilərinin iştirakı ilə maarifləndirici görüş olub, torpaqların qida maddələri ilə təmin olunmasına dair yenilənmiş kartoqramlar rayonun Aşağı Qışlaq, Yuxarı Qışlaq, Kolanı və Biçənək bələdiyyələrinə təqdim edilib.
Bugün 
