Naxçıvan Muxtar Respublikasının

İqtisadiyyat Nazirliyi yanında Əmlak Məsələləri Dövlət Xidməti haqqında

M Ə L U M A T

Naxçıvan  Muxtar  Respublikası Ali Məclisi sədrinin 2023-cü il 02 may tarixli 165-VI FR nömrəli Fərmanı ilə Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidməti Naxçıvan Muxtar Respublikasının İqtisadiyyat Nazirliyinin strukturuna daxil edilmişdir.

Naxçıvan  Muxtar  Respublikası Ali Məclisi  sədrinin 2023-cü il 29 dekabr  tarixli 225-VI FR nömrəli Fərmanı ilə Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidməti Naxçıvan Muxtar Respublikasının İqtisadiyyat Nazirliyi yanında Əmlak Məsələləri Dövlət Xidməti adlandırılmış, Xidmətin Əsasnaməsi təsdiq edilmişdir.

Naxçıvan  Muxtar  Respublikası Ali Məclisi sədrinin 2024-cü il 09 fevral tarixli 229-VI FR nömrəli Fərmanı ilə Naxçıvan Muxtar Respublikasının İqtisadiyyat Nazirliyi yanında Əmlak Məsələləri Dövlət Xidmətinin tabeliyində Naxçıvan Muxtar Respublikası Hərracların Təşkili üzrə Auksion Mərkəzinin əsasında “Hərracların Təşkili Mərkəzi”, “Daşınmaz Əmakın Dövlət Kadastrı və Reyestri” publik hüquqi şəxsələri yaradılmışdır. Fərmana əsasən, Xidmətin tabeliyində olan “Yerquruluşu, Geodeziya və Kartoqrafiya” Məhdud Məsuliyyətli Cəmiyyətinin adı dəyişdirilərək “Kadastr və Yerquruluşu Layihə-Tədqiqat Mərkəzi” Məhdud Məsuliyyətli Cəmiyyəti adlandırılmış, “Kadastr və Yerquruluşu Layihə-Tədqiqat Mərkəzi” Məhdud Məsuliyyətli Cəmiyyəti “Daşınmaz Əmakın Dövlət Kadastrı və Reyestri” publik hüquqi şəxsin tabeliyinə verilmişdir.

Naxçıvan Muxtar Respublikasının İqtisadiyyat Nazirliyi yanında Əmlak Məsələləri Dövlət Xidməti dövlət əmlakının idarə edilməsi, onun özəlləşdirilməsi, daşınmaz əmlakın dövlət reyestrinin, daşınmaz əmlakın vahid dövlət kadastrının tərtibi və aparılması, ünvan reyestrinin aparılması, dövlət torpaq kadastrı, yerquruluşu, torpaqların dövlət idarəetməsi, torpaq bazarının təşkili sahəsində dövlət siyasətini, habelə torpaqlardan istifadəyə və onların mühafizəsi sahəsində dövlət nəzarətini həyata keçirən, Naxçıvan Muxtar Respublikası İqtisadiyyat Nazirliyinin strukturuna daxil olan qurumdur.

Xidmət öz fəaliyyətində Azərbaycan Respublikasının və Naxçıvan Muxtar Respublikasının Konstitusiyalarını, Azərbaycan Respublikasının tərəfdar çıxdığı beynəlxalq müqavilələri, Azərbaycan Respublikasının və Naxçıvan Muxtar Respublikasının qanunlarını, Naxçıvan Muxtar Respublikasının İqtisadiyyat Nazirliyi haqqında Əsasnaməni, bu Əsasnaməni, Azərbaycan Respublikası Prezidentinin və Naxçıvan Muxtar Respublikası Ali Məclisi sədrinin digər fərman və sərəncamlarını, Azərbaycan Respublikası Nazirlər Kabinetinin və Naxçıvan Muxtar Respublikası Nazirlər Kabinetinin qərar və sərəncamlarını, habelə Nazirliyin hüquqi aktlarını rəhbər tutur.

Xidmətin strukturuna Xidmətin Aparatı, ərazi bölmələri və tabeliyindəki qurumlar daxildir. Xidmət öz fəaliyyətini bilavasitə və həmin qurumlar vasitəsilə həyata keçirir.

Hazırda Xidmət tərəfindən vətəndaşlara 54 adda elektron xidmət göstərilir.