İPOTEKA KREDİTLƏŞMƏSİ ƏHALİNİN MƏNZİLLƏ TƏMINATINDA MÜHÜM ƏHƏMİYYƏTƏ MALİKDİR
05.12.2018
Muxtar respublikamızda həyata keçirilən genişmiqyaslı quruculuq tədbirləri çərçivəsində əhalinin mənzilməişət şəraitinin yaxşılaşdırılması diqqət mərkəzində saxlanılır. Gənc və aztəminatlı ailələrin mənzil şəraitlərinin yaxşılaşdırılması istiqamətində kompleks tədbirlər həyata keçirilir, yeni yaşayış binaları tikilərək, yaxud yenidən qurularaq istifadəyə verilir,sosial məsələlərin həlli ilə bağlı əhəmiyyətli addımlar atılır. Aparılan sosial siyasətin mühüm bir istiqaməti isə vətəndaşlara mənzillərin ipoteka yolu ilə əldə edilməsi imkanlarının yaradılmasıdır.
Bu ilin ötən dövrü ərzində daşınmaz əmlakın dövlət reyestrində 292 ipoteka qeydiyyatı aparılıb. İpoteka krediti hesabına əldə edilmiş 64 mənzil, 16 fərdi yaşayış evi üzərində hüquqlar dövlət qeydiyyatına alınıb ki, bunun da 82,5 faizi Naxçıvan şəhərinin, 17,5 faizi isə muxtar respublikanın digər yaşayış məntəqələrinin payına düşür. Ötən ilin müvafiq dövrü ilə müqayisədə ipoteka ilə əldə edilən əmlakların qeydiyyatının sayı 25 faiz artıb.
Cari ildə ipoteka kreditləşməsi vasitəsi ilə əldə edilən mənzillərin hər kvadratmetrinin orta qiyməti 750 manat təşkil edib. İpoteka krediti hesabına, əsasən, iki və üçotaqlı mənzillərin alınmasına üstünlük verilib.
TORPAQLARIN ELEKTRON KADASTR UÇOTU İNFORMASİYA SİSTEMİNİN PROQRAM TƏMINATININ HAZIRLANMASI İSTİQAMƏTINDƏ GÖRÜLMÜŞ İŞLƏRİN NÖVBƏTİ MÜZAKİRƏSİ KEÇİRİLİB
28.11.2018
Noyabrın 27-də Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Komitəsində torpaqların elektron kadastr uçotu informasiya sisteminin proqram təminatının hazırlanması ilə bağlı növbəti müzakirələr aparılıb. Tədbirdə Daşınmaz Əmlak və Torpaq Məsələləri üzrə Dövlət Komitəsinin və proqram təminatını hazırlayan “R.İ.S.K.” Elmi İstehsalat Şirkətinin mütəxəssisləri iştirak edib.
R.İ.S.K.” Elmi İstehsalat Şirkətinin baş direktoru Cabir Cümşüdov sistemin fəaliyyətini təmin edəcək proqram təminatının hazırlanması istiqamətində görülmüş işlər barədə məlumat verib. Bildirilib ki, proqram təminatının yaradılması ilə bağlı əsas işlər artıq yekunlaşmaq üzrədir. Sistemin hazır modulları baxılması üçün Komitəyə təqdim olunub, Komitənin mütəxəssisləri tərəfindən verilən təkliflər əsasında proqram təminatında düzəliş və əlavələr edilib. Yaradılacaq sistemin daşınmaz əmlakın dövlət reyestri ilə inteqrasiyasının təmin olunması və prosesin avtomatlaşdırılması üçün sınaqlar aparılıb.
Sonra bu istiqamətdə görülən işlər əyani nümayiş olunub, proqram təminatının və elektron kadastr xəritəsinin təkmilləşdirilməsi ilə bağlı təkliflər verilib. Mövcud uyğunsuzluqların aradan qaldırılması yolları barədə geniş müzakirələr aparılıb.
KOMİTƏNİN KOLLEKTİVİ XATİRƏ MUZEYİNDƏ OLUB
26.11.2018
Noyabrın 24-də Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Komitəsinin və Komitənin tabeliyində olan Dövlət Yerquruluşu, Geodeziya və Xəritəçəkmə Layihə İnstitutunun kollektivləri Naxçıvan şəhərindəki Xatirə Muzeyini ziyarət ediblər.
Tanışlıq zamanı məlumat verilib ki, muzey Naxçıvan Muxtar Respublikası Ali Məclisi Sədrinin Sərəncamı ilə 1997-ci ildə yaradılıb, 2000-ci ilədək Şəhidlər Muzeyi adı ilə fəaliyyət göstərib. Muzey 8 avqust 2000-ci ildən etibarən Xatirə Muzeyi adlanır.
Bildirilib ki, muzeyin ekspozisiyasında xalqımıza qarşı törədilən qırğınlara və baş verən etnik qarşıdurmalara ilk hüquqi qiymətin verilməsi ilə bağlı ümummilli lider Heydər Əliyev tərəfindən imzalanan sənədlərin surətləri, eləcə də xalqımızın başına gətirilən faciələri əks etdirən materiallar və fotoşəkillər nümayiş olunur. 1918-1920-ci illərdə Naxçıvanda ermənilərin törətdikləri qanlı cinayətlər, 1941-1945-ci illər müharibəsinin Naxçıvandan olan iştirakçıları, ən yeni tariximizdə baş vermiş 20 Yanvar, Xocalı soyqırımı hadisələri haqqında eksponatlar bu tarixi dövrlər haqqında ətraflı məlumatlar verir.
NAXÇIVAN ŞƏHƏRİNDƏ YENİ ÜNVAN LÖVHƏLƏRİ QURAŞDIRILIR
15.11.2018
Müasir əmlak idarəçiliyində daşınmaz əmlakın vahid kadastrının tərkib hissəsi olan ünvan reyestri məlumatları mühüm əhəmiyyət kəsb edir. Bu baxımdan muxtar respublikamızda əhalisi 5 mindən yuxarı olan yaşayış məntəqələrində nəqliyyat infrastrukturu və daşınmaz əmlak obyektlərinə ünvanların verilməsi, eləcə də ünvan reyestrində müvafiq düzəliş və dəqiqləşmə işlərinin aparılması diqqət mərkəzində saxlanılır.
Bu ilin ötən dövrü ərzində ünvan lövhələri və giriş nömrə nişanlarının quraşdırılması məqsədi ilə Naxçıvan şəhərinin Heydər Əliyev prospektində və 21 küçədə ünvanların yenidən dəqiqləşdirilməsi işləri aparılıb. Uyğunsuzluq aşkar edilən küçə və məhəllələrdə daşınmaz əmlak obyektləri yenidən nömrələnib, ünvan lövhələri və giriş nömrə nişanlarının sayı müəyyənləşdirilib. Dəqiqləşmə işləri aparılan küçələrdə daşınmaz əmlak obyektlərinin ünvanlarındakı uyğunsuzluqların aradan qaldırılması üçün kameral şəraitdə ünvan xəritəsi üzərində iş aparılıb. Ünvanlarında düzəliş edilmiş daşınmaz əmlak obyektlərinə dair mülkiyyət sənədlərində müvafiq düzəlişlər edilərək təhvil verilib.
Naxçıvan şəhərinin Əziz Əliyev, Cəlil Məmmədquluzadə və Atatürk küçələrinə dair ünvan lövhələri və giriş nömrə nişanları nəqliyyat infrastrukturu obyektlərinə adların verilməsi, daşınmaz əmlak obyektlərinə ünvan nömrələrinin təyini, ünvan lövhələrinin yerləşdirilməsi qaydalarına uyğun hazırlanıb, adıçəkilən küçələrdə yeni ünvan lövhələri və giriş nömrə nişanları quraşdırılıb.
Bugün 
