Mətbuat xidməti
KƏNGƏRLİ RAYONUNDA AİLƏ TƏSƏRRÜFATLARI İLƏ MAARİFLƏNDİRİCİ GÖRÜŞ KEÇİRİLİB
22.06.2021
İyunun 22-də Kəngərli rayonunun Yurdçu kəndində Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidmətinin, İqtisadiyyat, Kənd Təsərrüfatı nazirliklərinin, AMEA Naxçıvan Bölməsinin, Antiinhisar və İstehlak Bazarına Nəzarət Dövlət Xidmətinin və Kəngərli Rayon İcra Hakimiyyətinin birgə təşkilatçılığı ilə rayon ərazisində fəaliyyət göstərən ailə təsərrüfatları ilə maarifləndirici görüş keçirilib.
Tədbiri giriş sözü ilə Kəngərli Rayon İcra Hakimiyyəti Aparatının ərazi idarəetmə və yerli özünüidarəetmə orqanları ilə iş şöbəsinin müdiri Ağa Seyidov açaraq muxtar respublikamızda ailə təsərrüfatlarının inkişafına göstərilən dövlət qayğısından, rayonda bu sahədə həyata keçirilən tədbirlərdən danışıb.
Sonra Daşınmaz Əmlak və Torpaq Məsələləri üzrə Dövlət Xidmətinin əməkdaşı tərəfindən daşınmaz əmlak obyektlərinin pasportlaşdırılmasının əhəmiyyəti, daşınmaz əmlaka hüquqların əmələ gəlməsinin, başqasına keçməsinin, məhdudlaşdırılmasının və xitam verilməsinin dövlət qeydiyyatı üçün lazım olan əsaslar, əkin atlaslarına uyğun əkinlərin aparılmasının əhəmiyyəti, torpaqlardan səmərəli istifadə sahəsində qanunvericiliyin tələbləri tədbir iştirakçılarının diqqətinə çatırılıb.
Tədbirdə ailə təsərrüfatlarında istehsal olunan məhsulların təbliği və təşviqi, qablaşdırılması, etiketlənməsi, yaz əkinlərinin əkin atlaslarına uyğun aparılması, növbəli əkin sisteminin tətbiqi, ailə təsərrüfatçılarının kiçik sahibkarlıq subyektlərinə çevrilməsi, meyvə-tərəvəzlərin, bostan məhsullarının qurudulması və qablaşdırılması barədə təsərrüfat sahiblərinə mütəxəssis məsləhətləri verilib.
SƏDƏRƏK RAYONUNDA TORPAQLARIN MÜNBİTLİYİNİN ARTIRILMASI İLƏ BAĞLI MAARİFLƏNDİRİCİ TƏDBİR KEÇİRİLİB
18.06.2021
Naxçıvan Muxtar Respublikası Ali Məclisi Sədrinin 2020-ci il 27 noyabr tarixli Sərəncamı ilə təsdiq edilmiş “2021-2025-ci illərdə Naxçıvan Muxtar Respublikasında kənd təsərrüfatı təyinatlı torpaqların münbitliyinin artırılmasına dair Tədbirlər Planı”na uyğun olaraq Daşınmaz Əmlak və Torpaq Məsələləri üzrə Dövlət Xidmətinin, Kənd Təsərrüfatı, Ekologiya və Təbii Sərvətlər Nazirliklərinin, Meliorasiya və Su Təsərrüfatı Açıq Səhmdar Cəmiyyətinin, Sədərək Rayon İcra Hakimiyyətinin birgə təşkilatçılığı ilə Sədərək kəndində torpaq mülkiyyətçiləri, bələdiyyələr və sahibkarların iştirakı ilə seminar-müşavirə keçirilib.
Seminar-müşavirəni giriş sözü ilə Sədərək Rayon İcra Hakimiyyətinin şöbə müdiri Mahir Vəliyev açaraq tədbirin əhəmiyyəti barədə məlumat verib.
Seminar-müşavirədə aid təşkilatların nümayəndələri tərəfindən torpaqların münbitliyinin əhəmiyyəti və onun artırılması yolları, torpaqlardan səmərəli istifadə və torpaq mülkiyyətçilərinin mülkiyyət hüquqları, gübrələrdən düzgün istifadənin məhsuldarlıqda əsas amil olması, aqrotexniki tədbirlərin düzgün aparılması, örüş sahələrində eroziyanın və səhralaşmanın, habelə ərazilərin mal-qara ilə normadan artıq yüklənməsinin qarşısının alınması, qrunt sularının səviyyəsinin yüksək olduğu ərazilərdə yeni drenaj-kollektor şəbəkələrinin tikintisinin aparılması, mövcud kanallarda su sızmalarının qarşısının alınması, növbəli əkin sisteminin tətbiq edilməsi barədə iştirakçılara məlumat verilib.
DAŞINMAZ ƏMLAKIN YENİLƏNMİŞ ELEKTRON QEYDİYYAT SİSTEMİNİN TƏQDİMATI OLUB
18.06.2021
Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidməti tərəfindən müasir texnoloji yeniliklərin tətbiqi ilə əhaliyə göstərilən xidmətlərin keyfiyyətinin yüksəldilməsi daim diqqət mərkəzində saxlanılır. Xidmətdə daşınmaz əmlakın qeydiyyatı prosesinin daha da sadələşdirilməsi, bu sahədə operativliyin artırılması üçün bir sıra yeniliklərin tətbiqinə başlanılıb.
Bu münasibətlə keçirilən tədbirdə Xidmətin rəisi Müslüm Cabbarzadə bildirib ki, həyata keçirilən tədbirlərin davamı kimi daşınmaz əmlakın elektron qeydiyyatı sisteminin proqram təminatı yenilənib, müvafiq funksionallıqlar yaradılıb. Qeydiyyat prosesinin avtomatlaşdırlması məqsədi ilə Daşınmaz əmlakın dövlət reyestri ilə Ümumi Notariat Elektron Məlumat Sistemi, İdarələrarası Avtomatlaşdırılmış Məlumat Axtarış Sistemi, Hökumət Ödəniş Sistemi arasında elektron əlaqə yaradılıb. Vətəndaşlara müraciətin icrası ilə bağlı SMS xidmətinin göstərilməsi təmin edilib. Xidmətin internet səhifəsində elektron xidmətlər bölməsinə “Daşınmaz əmlakın dövlət reyestrindən elektron çıxarışın verilməsi” və “Daşınmaz əmlakın dövlət reyestrindən elektron çıxarışın yoxlanılması” xidmətləri əlavə edilərək Elektron Hökumət Portalına inteqrasiya olunub.
NAXÇIVAN MUXTAR RESPUBLİKASININ QARS MÜQAVİLƏSİ İLƏ TƏSBİT OLUNMUŞ ƏRAZİSİNİN XƏRİTƏSİ HAZIRLANIR
17.06.2021
2021-ci il fevralın 8-də Naxçıvan Muxtar Respublikası Ali Məclisinin Sədri tərəfindən mühüm tarixi-siyasi əhəmiyyətə malik olan və Naxçıvanın muxtariyyət statusuna təminat verən Qars müqaviləsinin 100 illiyinin keçirilməsi haqqında Sərəncam imzalanmışdır. Həmin Sərəncamla təsdiq olunmuş “Qars müqaviləsinin 100 illiyinin Naxçıvan Muxtar Respublikasında keçirilməsi ilə əlaqədar Tədbirlər Planı”nda Naxçıvan Muxtar Respublikasının Qars müqaviləsi ilə təsbit olunmuş ərazisinin xəritəsinin hazırlanması ilə bağlı vəzifələr müəyyənləşdirilmişdir.
Tədbirlər Planının müvafiq bəndinin icrası ilə əlaqədar olaraq Daşınmaz Əmlak və Torpaq Məsələləri üzrə Dövlət Xidməti tərəfindən müqavilənin 5-ci maddəsinə və 3-cü əlavəsinə uyğun olaraq Naxçıvan Muxtar Respublikasının təsbit olunmuş sərhədlərini əhatə edən ərazilərdə coğrafi obyektlər müəyyənləşdirilmişdir.
Bugün 
