Mətbuat xidməti
İTALİYANIN AZƏRBAYCANDAKI SƏFİRİ İLƏ GÖRÜŞ KEÇİRİLİB
17.07.2024
İqtisadiyyat naziri Mikayıl Cabbarov İtaliyanın Azərbaycandakı səfiri Luka Di Canfrançesko ilə görüşüb.
Görüşdə ölkələrimiz arasında digər sahələrdə olduğu kimi, iqtisadi-ticarət əməkdaşlığının dinamik surətdə inkişaf etməsindən məmnunluq ifadə olunub. Azərbaycan ilə İtaliya arasında əlaqələrin xüsusilə enerji sahəsindən başlandığı, sonra müxtəlif sahələri, o cümlədən informasiya-kommunikasiya texnologiyaları, nəqliyyat, kənd-təsərrüfatı, “yaşıl” enerji və digər sahələri əhatə etdiyi bildirilib.
Tərəflər ölkələrimizin səmərəli əməkdaşlığının gücləndirilməsi üçün birgə təşəbbüslərin dəstəklənməsinin vacibliyini, Azərbaycanın işğaldan azad olunmuş ərazilərində aparılan bərpa-quruculuq işlərində əməkdaşlıq potensialını vurğulayıblar.
NAXÇIVANDA HƏRRAC YOLU İLƏ 8 TORPAQ SAHƏSİ MÜLKİYYƏTƏ, 2 TORPAQ SAHƏSİ İCARƏYƏ VERİLİB
16.07.2024
İyulun 16-da Naxçıvan Muxtar Respublikasının İqtisadiyyat Nazirliyi yanında Əmlak Məsələləri Dövlət Xidmətinin tabeliyində “Hərracların Təşkili Mərkəzi” publik hüquqi şəxs tərəfindən muxtar respublikanın 7 bələdiyyəsinə məxsus 8 torpaq sahəsinin mülkiyyətə, 2 torpaq sahəsinin isə icarəyə verilməsi ilə bağlı hərrac keçirilib.
Torpaq sahələrinin hərracında qeydiyyatdan keçmiş 20 sifarişçi iştirak edib.
Əmlak Məsələləri Dövlət Xidmətində baş tutan hərrac prosesinin videokamera ilə çəkilişi aparılıb. Rəqabətli keçən proses nəticəsində hərraca çıxarılan 8 torpaq sahəsi mülkiyyətə, 2 torpaq sahəsi isə icarəyə verilib. 10 sahibkar hərracın qalibi olub.
Sahibkarlıq fəaliyyəti üçün hərraca çıxarılan torpaq sahələrinin ilkin satış və icarə qiymətləri müvafiq ərazilər üzrə torpaq sahələrinin bazar qiyməti nəzərə alınmaqla müəyyənləşdirilib.
Xatırladaq ki, Mərkəz tərəfindən 9 iyulda dövlət mülkiyyətində olan 11 avtonəqliyyat vasitəsinin, 11 iyulda 12 qeyri-yaşayış sahəsinin satışı, 12 iyulda bələdiyyə mülkiyyətində olan 1 torpaq sahəsinin icarəyə verilməsi ilə bağlı hərraclar baş tutub. 18 iyulda keçirilməsi nəzərdə tutulan hərracda isə muxtar respublikanın 6 yaşayış məntəqəsi üzrə dövlət mülkiyyətində olan 13 qeyri-yaşayış sahəsi satışa çıxarılacaq.
NAXÇIVANDA DÖVLƏT ƏMLAKIN ÖZƏLLƏŞDİRİLMƏSİ ÜZRƏ NÖVBƏTİ HƏRRAC KEÇİRİLİB
11.07.2024
İyulun 11-də Naxçıvan Muxtar Respublikasının İqtisadiyyat Nazirliyi yanında Əmlak Məsələləri Dövlət Xidmətinin tabeliyində “Hərracların Təşkili Mərkəzi” publik hüquqi şəxs tərəfindən dövlət əmlakının özəlləşdirilməsi üzrə növbəti hərrac keçirilib. Hərraclar tam şəffaf və rəqabətli mühitdə baş tutub.
Hərracda muxtar respublikanın 7 yaşayış məntəqəsi üzrə müxtəlif xidmət sahələrinə aid dövlət mülkiyyətində olan, ümumilikdə 13 qeyri-yaşayış sahəsi satışa çıxarılıb. Hərracda 12 dövlət əmlakı özəlləşdirilib, 12 sifarişçi hərracın qalibi olub.
“Hərracların Təşkili Mərkəzi” publik hüquqi şəxs tərəfindən 9 iyulda dövlət mülkiyyətində olan 11 avtonəqliyyat vasitəsinin satışı həyata keçirilib.
Qeyd edək ki, dövlət əmlakının özəlləşdirilməsi ilə bağlı növbəti hərracın 16 və 18 iyul tarixlərində keçirilməsi nəzərdə tutulur. Hərraca muxtar respublikanın 7 bələdiyyəsi üzrə 8 torpaq sahəsinin mülkiyyətə, 2 torpaq sahəsinin icarəyə verilməsi, 6 yaşayış məntəqəsi üzrə dövlət mülkiyyətində olan 13 qeyri-yaşayış sahəsi çıxarılacaq.
Ətraflı məlumatı Naxçıvan Muxtar Respublikasının İqtisadiyyat Nazirliyi yanında Əmlak Məsələləri Dövlət Xidmətinin http://emlak.nakhchivan.az/ rəsmi saytından əldə etmək olar.
AZƏRBAYCAN-ÖZBƏKİSTAN İQTİSADİ MÜNASİBƏTLƏRİNİN İNKİŞAFI ÜÇÜN BÖYÜK POTENSİAL VAR
11.07.2024
Mikayıl Cabbarovun rəhbərlik etdiyi nümayəndə heyətinin Özbəkistana işgüzar səfərində iqtisadi tərəfdaşlığın müxtəlif istiqamətlər üzrə möhkəmləndirilməsi imkanları müzakirə olunub.
İqtisadiyyat naziri Mikayıl Cabbarovun rəhbərlik etdiyi nümayəndə heyəti Özbəkistana işgüzar səfər edib, Buxarada iqtisadi sahədə birgə fəaliyyətin genişləndirilməsi məqsədilə yeni imkanlar nəzərdən keçirilib.
Özbəkistanın investisiyalar, sənaye və ticarət naziri Ləziz Kudratovla görüşdə vurğulanıb ki, Azərbaycan və Özbəkistan dövlət başçıları iqtisadi tərəfdaşlığın möhkəmləndirilməsinə xüsusi önəm verir ki, bu da hər iki ölkəninin iqtisadi inkişafına töhfə verməklə yanaşı, regional inkişafı stimullaşdırır.
Görüşdə ölkələrimiz arasında müxtəlif iqtisadi istiqamətlər üzrə yeni imkanlar nəzərdən keçirilib, bu məqsədlə birgə təşəbbüslərin artırılmasının önəmi qeyd olunub. Tərəflər sənaye, kənd təsərrüfatı, enerji, o cümlədən, bərpa olunan enerji, həmçinin karbonsuzlaşma sahələrində əməkdaşlıq məsələlərini müzakirə ediblər.
Özbəkistan Respublikası ilə Azərbaycan Respublikası arasında əməkdaşlıq üzrə birgə hökumətlərarası komissiyanın 13-cü iclası keçirilib.
Hökumətlərarası Komissiyanın həmsədrləri, Azərbaycanın iqtisadiyyat naziri Mikayıl Cabbarov və Özbəkistanın investisiyalar, sənaye və ticarət naziri Ləziz Kudratov Komissiyanın işgüzar münasibətlərin inkişafı və birgə layihələrin icra edilməsi üçün səmərəli platforma olduğunu vurğulayıblar.
Bugün 
