BABƏK RAYONUNDA DAŞINMAZ ƏMLAKIN QEYDİYYATI VƏ TORPAQLARDAN İSTİFADƏYƏ DÖVLƏT NƏZARƏTİ DİQQƏTDƏ SAXLANILIR
15.08.2023
Daşınmaz Əmlak və Torpaq Məsələləri üzrə Dövlət Xidmətinin Babək Rayon İdarəsi tərəfindən cari ilin iyul ayı ərzində daşınmaz əmlakın qeydiyyatı və torpaqlardan istifadəyə dövlət nəzarəti gücləndirilib, əhaliyə göstərilən xidmətlərin keyfiyyəti yüksəldilib. Ötən ay idarə tərəfindən 18 fərdi yaşayış evinə məxsus texniki pasport, 68 torpaq sahəsinin planı və ölçüsü hazırlanaraq vətəndaşlara təqdim edilib. Texniki sənədlərin hazırlanması məqsədilə əmlaklara yerində baxış keçirilib, 23 müayinə aktı yazılaraq arxiv sənədlərinə əlavə olunub. Hüquqların dövlət qeydiyyatına alınması və dövlət reyestrindən çıxarışın verilməsi ilə bağlı 92 müraciət qəbul edilib və icra olunub. Müvafiq dövrdə məhdudiyyət və yüklülüyə dair 27, əmlakın olub-olmaması ilə bağlı 55 arayış verilib.
ÖTƏN AY ƏRZİNDƏ 642 TEXNİKİ SƏNƏD HAZIRLANIB
04.08.2023
Muxtar respublikada torpaqlardan istifadəyə və onların mühafizəsinə dövlət nəzarətinin gücləndirilməsi, mülkiyyət hüquqlarının qeydiyyatı zamanı operativliyin təmin edilməsi iyul ayı ərzində Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidməti tərəfindən diqqətdə saxlanılıb.
Şahbuz rayonunun Daylaqlı kəndində bələdiyyə sədrlərinin, ailə təsərrüfatı başçılarının, torpaq mülkiyyətçilərinin, istifadəçilərinin və icarəçilərinin iştirakı ilə maarifləndirici tədbir keçirilib. Tədbir iştirakçılarına əkin atlaslarından istifadə edilməklə məhsuldarlığın artırılmasına nail olunması, torpaqlardan səmərəli istifadə yolları və onların mühafizəsi qaydaları haqqında məlumat verilib.
Torpaqların elektron kadastr uçotu informasiya sistemində dövlət və bələdiyyə mülkiyyətində olan torpaq sahələrinin uçotunun dəqiqləşdirilməsi məqsədilə kənd təsərrüfatı yerləri (uqodiyaları), nəqliyyat, kommunikasiya xətləri, kanal və kollektorlar, mövcud meşə və meşə zolaqlarının əhatə etdiyi ərazilər müəyyənləşdirilib və elektron kadastr xəritəsində uçotu aparılıb. Babək rayon inzibati ərazi vahidini əhatə edən bələdiyyələr üzrə işlər davam etdirilib.
Babək rayonunun Xəlilli kəndində həyətyanı torpaq sahələrinin sərhədlərinin dəqiqləşdirilməsi məqsədi ilə planaalma işləri başa çatdırılıb, kənd təsərrüfatı təyinatlı torpaq sahələri və onların mülkiyyətçiləri haqqında əvvəllər yaranmış hüquqlara dair 530 məlumat daşınmaz əmlakın elektron qeydiyyat sisteminə daxil edilib.
BİRİNCİ YARIMİLİN YEKUNLARI VƏ QARŞIDA DURAN VƏZİFƏLƏR MÜZAKİRƏ EDİLİB
31.07.2023
Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidmətində birinci yarımildə yerinə yetirilən işlərin müzakirəsi və qarşıya qoyulan vəzifələrin müəyyənləşdirilməsinə dair kollegiya iclası keçirilib. Xidmətin rəisi Müslüm Cabbarzadə iclası açaraq 2023-cü ilin ötən altı ayında görülən işlər barədə məlumat verib.
Xidmətin Şahbuz, Kəngərli və Sədərək rayon şöbələrinin fəaliyyətinin yoxlanılmasının nəticələrinə dair Xidmət Aparatının rəhbəri Ayaz Cabbarovun, Xidmətin tabeliyində olan “Yerquruluşu, Geodeziya və Kartoqrafiya” Məhdud Məsuliyyətli Cəmiyyətinin fəaliyyəti haqqında Cəmiyyətin direktoru Cəfər Əliyevin, Naxçıvan Muxtar Respublikasında dövlət, bələdiyyə və xüsusi mülkiyyətdə olan torpaqlardan təyinatı üzrə istifadəyə nəzarətin gücləndirilməsi və torpaqların mühafizəsi sahəsində görülmüş işlər, Babək, Ordubad, Culfa, Şahbuz və Kəngərli rayon inzibati ərazi vahidlərinin xəritə materiallarının, yerquruluşu sənədləri qovluğunun hazırlanması və aidiyyəti üzrə təqdim edilməsi ilə bağlı görülmüş işlərlə əlaqədar Torpaq məsələləri şöbəsinin müdiri İntizar Həziyevin, hüquqların qeydiyyatı ilə bağlı sənədlərin qəbulu, ekspertizası, texniki sənədlərin hazırlanması, daşınmaz əmlakın dövlət reyestrindən çıxarışların və arayışların verilməsi vəziyyəti ilə bağlı Daşınmaz əmlak məsələləri şöbəsinin müdiri Əkbər Əliyevin çıxışları dinlənilib. Müzakirə olunan məsələlərə dair kollegiyanın qərar layihəsi oxunaraq səsə qoyulub və qəbul edilib.
“BƏLƏDİYYƏ TORPAQLARININ İDARƏ EDİLMƏSİ” MÖVZUSUNDA SEMİNAR KEÇİRİLİB
27.07.2023
Naxçıvan Muxtar Respublikası Ədliyyə Nazirliyinin, Daşınmaz Əmlak və Torpaq Məsələləri üzrə Dövlət Xidmətinin, Naxçıvan Şəhər İcra Hakimiyyətinin və Hərracların Təşkili üzrə Auksion Mərkəzinin birgə təşkilatçılığı ilə Qaraçuq kəndində Naxçıvan şəhərində fəaliyyət göstərən bələdiyyə sədrləri və üzvləri üçün seminar keçirilib.
Tədbirdə Naxçıvan Şəhər İcra Hakimiyyətinin əməkdaşı Nail Əliyev bələdiyyələrdə işin səmərəli qurulması məqsədilə görülən tədbirlər və keçirilən maarifləndirici seminarın əhəmiyyəti barədə məlumat verib.
Digər çıxış edənlər diqqətə çatdırıb ki, bələdiyyə mülkiyyətində olan torpaqlardan səmərəli və təyinatı üzrə istifadə olunması bu sahədə müsbət nəticələrin əldə olunmasına zəmin yaradır. Həmin məsələlər aidiyyəti dövlət qurumları tərəfindən diqqətdə saxlanılır və maarifləndirmə tədbirləri həyata keçirilir. Bələdiyyələrin fəaliyyətinə inzibati nəzarətin nəticələri göstərir ki, torpaq sahələrinin mülkiyyətə verilməsi ilə bağlı torpaq münasibətlərini tənzimləyən normativ hüquqi aktların tələblərinə tam şəkildə əməl edilmir. Bu baxımdan bələdiyyələrin fəaliyyəti qanunvericiliyin tələblərinə uyğun qurulmalıdır. Müvafiq tələblərlə bağlı qanunvericiliyin müddəaları tədbir iştirakçılarına hərtərəfli izah olunub.
Bugün 
