NÖVBƏTİ SEMİNAR-MÜŞAVİRƏ KƏNGƏRLİ RAYONUNUN TORPAQ MÜLKİYYƏTÇİLƏRİ İLƏ KEÇİRLİB
22.09.2022
Sentyabrın 21-də Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidmətinin, Kənd Təsərrüfatı Nazirliyinin, Antiinhisar və İstehlak Bazarına Nəzarət Dövlət Xidmətinin, o cümlədən Kəngərli Rayon İcra Hakimiyyətinin birgə təşkilatçılığı ilə Böyükdüz kəndində torpaq mülkiyyətçiləri, istifadəçiləri, icarəçiləri və rayon ərazisində fəaliyyət göstərən ailə təsərrüfatları ilə seminar-müşavirə keçirilib.
Tədbir zamanı muxtar respublikamızda aqrar sahənin inkişafına göstərilən dövlət qayğısından, həyata keçirilən tədbirlərdən və qarşıda duran vəzifələrdən danışılıb, iştirakçılar əkin atlasların uyğun əkinlərin aparılması, növbəli əkin sisteminin tətbiqi, ailə təsərrüfatlarında məhsul çeşidinin genişləndirilməsi, təsərrüfatlarda ixtisaslaşmanın əhəmiyyəti və istehsal olunan məhsulların təbliği ilə bağlı maarifləndirilib.
Seminar müşavirədə muxtar respublikamızda torpaqlardan səmərəli istifadə sahəsində dövlət səviyyəsində həyata keçirilən tədbirlərdən bəhs edilib, torpaqların münbitliyinin qorunması və artırılması yolları barədə məlumat verilib. Torpaq mülkiyyətçilərinin, istifadəçilərinin və icarəçilərinin hüquq və vəzifələri onlara ətraflı izah edilib, torpağa münasibətdə qanunsuz əməllərin yaratdığı məsuliyyət tədbir iştirakçılarının diqqətinə çatdırılıb.
MÜLKİYYƏT HÜQUQLARININ DÖVLƏT QEYDİYYATI ARTIB
09.09.2022
Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidmətinin Şərur Rayon İdarəsi tərəfindən mülkiyyət hüquqlarının dövlət qeydiyyatına alınması cari ilin avqust ayı ərzində diqqətdə saxlanılıb.
İdarə tərəfindən müraciətlər əsasında 17 fərdi yaşayış evinin, 3 mənzilin, ümumilikdə 20 daşınmaz əmlak obyektinin texniki pasportu, 79 həyətyanı, 69 kənd təsərrüfatı təyinatlı torpaq sahəsinin plan-ölçüsü hazırlanaraq vətəndaşlara təqdim edilib. Texniki sənədlərin hazırlanması zamanı 2 birləşmə planı, 29 müayinə aktı tərtib edilib və arxiv sənədlərinə əlavə olunub.
Ay ərzində məhdudiyyət və yüklülüyə dair 125, əmlakın olub-olmamasına dair 14 arayış hazırlanaraq vətəndaşlara təqdim olunub, 5 əmlakın bazar dəyərinə uyğun qiymətləndirilməsi icra edilib.
Rayonun Aşağı Yaycı və Çərçiboğan kəndlərində vətəndaşlara səyyar xidmət göstərilib. Vətəndaşlardan daxil olmuş 15 şifahi müraciət əsasında əmlaklara yerində baxış keçirilib, müraciətlər qanunauyğun cavablandırılıb.
MUXTAR RESPUBLİKADA TORPAQLARDAN QANUNSUZ İSTİFADƏ HALLARININ QARŞISI ALINIR
08.09.2022
Muxtar respublikamızda kənd təsərrüfatının əsas istehsal vasitəsi olan torpağın istifadəsinə və mühafizəsinə dövlət nəzarətinin həyata keçirilməsi daim diqqət mərkəzində saxlanılır, mütəmadi monitorinqlər aparılır.
Torpaqlardan səmərəli istifadə və onların mühafizəsinə dövlət nəzarətinin həyata keçirilməsi məqsədilə cari ilin ötən dövrü ərzində Şərur və Kəngərli rayonlarında, eyni zamanda Şahbuz rayonunun Türkeş, Sələsüz, Daylaqlı, Mərəlik, Kiçikoba, Külüs, Şahbuzkənd, Keçili, Mahmudoba və Nursu kəndlərində monitorinqlər yekunlaşdırılıb. Şərur rayonunun Alışar, Aşağı Yaycı, Yuxarı Yaycı, Axura, Dərvişlər, Gümüşlü, Həmzəli, Muğanlı, Püsyan, Şahbulaq, Siyaqut və Tumaslı kəndlərində 22 hektar, Kəngərli rayonunun Qıvraq qəsəbəsində 1,3 hektar və Şahbuz rayonunun 10 yaşayış məntəqəsində 38 hektar torpaq sahəsi əvvəlki vəziyyətinə (bələdiyyə mülkiyyətinə) geri qaytarılıb.
Aparılmış yoxlamalar nəticəsində bələdiyyə mülkiyyətində olan torpaq sahələrinin, eyni zamanda yol, kanal və arxların mühafizə zonalarının zəbt etmiş vətəndaşlarla yerli icra nümayəndələri ilə birlikdə fərdi qaydada maarifləndirici söhbətlər aparılıb, vətəndaşlara Azərbaycan Respublikasının Torpaq Məcəlləsinin 111-ci maddəsinin tələbləri, yəni torpaq sahələrinin özbaşına tutulması, zəbt olunmasının qadağan olunduğu izah edilib.
VƏTƏNDAŞLARIN MÜRACİƏTLƏRİ OPERATİV ŞƏKİLDƏ CAVABLANDIRILIR
08.09.2022
Naxçıvan Muxtar Respublikası Daşınmaz Əmlak və Torpaq Məsələləri üzrə Dövlət Xidmətinin Babək Rayon İdarəsi tərəfindən vətəndaşlara göstərilən xidmətlərin səviyyəsinin yüksəldilməsi, vətəndaş müraciətlərinin operativ şəkildə cavablandırılması diqqət mərkəzində saxlanılıb, daşınmaz əmlak, torpaq və digər fəaliyyət istiqamətləri üzrə görülən işlər cari ilin avqust ayı ərzində mütəşəkkil davam etdirilib.
Ay ərzində müraciətlər əsasında 25 fərdi yaşayış evinə, 1 mənzilə, 1 qeyri-yaşayış sahəsinə məxsus olmaqla, ümumilikdə, 27 texniki pasport hazırlanıb, 57 torpaq sahəsinin planı və ölçüsü tərtib edilib. Texniki sənədlərin hazırlanması zamanı 10 bölgü planı, 50 müayinə aktı tərtib edilib və arxiv sənədlərinə əlavə olunub.
Hüquqların dövlət qeydiyyatına alınması və dövlət reyestrindən çıxarışın verilməsi üçün 95 müraciət qəbul edilərək icra edilib. Məhdudiyyət və yüklülüyə dair 70, əmlakın olub-olmamasına dair 20 arayış, 11 torpaq sahəsinə dair rəy hazırlanıb.
Rayonun Məmmədrza Dizə və Gülşənabad kəndlərində vətəndaşlara səyyar xidmət göstərilib, qəbul edilmiş müraciət operativ icra edilərək hazırlanmış mülkiyyət sənədləri hüquq sahiblərinə təqdim edilib.
Bugün 
