CULFA RAYONUNDA SEMİNAR-MÜŞAVİRƏ KEÇİRİLİB

24.02.2023

Naxçıvan Muxtar Respublikası Kənd Təsərrüfatı Nazirliyinin, Daşınmaz Əmlak və Torpaq Məsələləri üzrə Dövlət Xidmətinin, Antiinhisar və İstehlak Bazarına Nəzarət Dövlət Xidmətinin və Culfa Rayon İcra Hakimiyyətinin birgə təşkilatçılığı ilə Əbrəqunus kəndində keçirilən seminar-müşavirədə rayonun torpaq mülkiyyətçiləri və ailə təsərrüfatçıları iştirak edib.

Seminar-müşavirədə Culfa Rayon İcra Hakimiyyətinin əməkdaşı Xaliq Məmmədov rayonda aqrar sahədə həyata keçirilən tədbirlərdən, ailə təsərrüfatlarının inkişafı ilə əlaqədar görülən işlərdən və bu sahəyə göstərilən dövlət qayğısından danışıb.

Aid təşkilatların nümayəndələri ailə təsərrüfatlarında istehsal olunan məhsulların təbliği və təşviqi, qablaşdırılması, etiketlənməsi, yaz əkinlərinin əkin atlaslarına uyğun aparılması, növbəli əkin sisteminin tətbiq edilməsi və torpaqlardan səmərəli istifadə yolları ilə bağlı torpaq mülkiyyətçilərinə və ailə təsərrüfatçılarına ətraflı məlumat verib.

Sonda mövzu ətrafında müzakirələr aparılıb, iştirakçıları maraqlandıran suallar cavablandırılıb.

Baxılıb: 169